نفضة العالم من أجل غزة صفاء مصطفى 🇪🇬

 

نفضة العالم من أجل غزة  

صفاء مصطفى  🇪🇬

غزة مش مجرد اسم على خريطة. غزة بقت رمز وصوت وصورة بتفضح قد إيه العالم ممكن يبقى قاسي وصامت في نفس الوقت. مدينة صغيرة محاصَرة لكن بتقف قدام واحدة من أعتى آلات الحرب في التاريخ الحديث وبتقول: لسه فينا نفس ولسه عندنا كرامة

من سنين طويلة والاحتلال بيحاول يزرع الخوف يهدم البيوت يكسر النفوس، لكن الحقيقة إن غزة ما استسلمتش بالعكس كل مرة بتتعرض للقصف، بتقوم أقوى وبتدي درس جديد:

 إن الإرادة مش بتنتهى بالرصاص وإن الحق ما بيموتش حتى لو حاولوا يدفنوه تحت الركام

النهاردة العالم كله شايف الصور بتوصل للبيوت الأخبار بتملأ الشاشات ومع كده… في صمت. صمت موجع أكتر من أي قصف عشان كده اللي محتاجاه غزة مش تعاطف لحظي لكن نفضة عالمية حقيقية

نفضة من الناس العاديين  اللي ممكن بكلمة أو صورة يغيروا وعي غيرهم البسيط اللي مش بيده قرار سياسي لكنه بيده ينقل الحقيقة وما يسمحش بغسيل دماغه

نفضة من الإعلام اللي المفروض يكون صوت المظلوم مش صدى لرواية المحتل كلمة الحق أمانة وغزة محتاجة الإعلام يكون مرآتها الحقيقية

نفضة من المؤسسات الدولية: اللي كتير منها واقف مكانه أو بيتفرج. فيه قوانين فيه قرارات فيه مواثيق… ليه مش بتتفعل؟ ليه الظالم دايما فوق القانون؟

نفضة من العرب والمسلمين غزة مش مجرد قضية فلسطينية

 غزة امتحان لهويتنا وضميرنا ووحدتنا اللي يسيب غزة لوحدها كأنه بيقبل يسيب نفسه من غير سند

الاحتلال يقدر يضرب يهدم يحاصر… لكن مش هيقدر يقتل الفكرة. والفكرة هنا أكبر من حدود غزة فكرة الحرية

 الحرية اللي هي أبسط حقوق الإنسان واللي مفيش أمة بتعيش من غيرها

النهاردة السكوت بقى شريك في الجريمة اللي ساكت كأنه بيقول.....

 أنا موافق والتاريخ مش هيرحم ومش هيفرق بين اللي ضغط على الزناد واللي قعد يتفرج.

غزة رغم نزيفها لسه بتكتب للعالم رسالة

"احنا لينا حق مش هنتنازل عنه. كرامتنا مش للبيع. وحريتنا مش فضل من حد"...

يمكن الاحتلال يفتكر إنه قادر يكسر غزة لكن الحقيقة إنه هو اللي بيتكشف يتكشف قدام العالم إنه ضعيف قدام إرادة ناس بتدافع عن أرضها وكرامتها

نفضة العالم مش لازم تكون حرب ولا صدام النفضة الحقيقية تبدأ من الوعي من كلمة بتتقال من موقف صادق من ضمير صاحي لأن اللي مش هيتحرك النهاردة لغزة بكرة هيلاقي نفسه واقف وحيد قدام نفس الظلم

غزة مش قصة شعب بعيد… غزة قصتنا كلنا. غزة مرايتنا… يا نكون معاها في صف الحق يا نلاقي نفسنا في صف الصمت والخيانة.