سر لغز كيزاد قناة السويس بقلم اللواء سامي دنيا 🇪🇬

 

حصريا: توضيح اللغط بخصوص "كيزاد شرق بورسعيد"

المصري اليوم كاتبة عنوان كان محتاج توضيح أكتر، لكن اللطيف ايه بقى؟ 

إن في ناس بتقول على نفسها مثقفة، شافت العنوان ده من غير ما تكلف خاطرها تقرا التفاصيل، وبدأت تتكلم عن إن ازاي يعني وصل بينا الحال للتفريط في قناة السويس 50 سنة كحق انتفاع للإمارات؟ 

الجدية اللي الناس دي بتتكلم بيها تخوف فعلا، ازاي حد قادر يفتي بالثقة دي في حاجة هو مش عارف تفاصيلها اللي كان ممكن يعرفها لو داس على اللينك بس!

طيب هو ايه الموضوع؟ 

الموضوع مالوش أي علاقة بالممر الملاحي، وهو اتفاق عظيم ومربح جدا لمصر وطبعا للإمارات، لإنشاء منطقة صناعية اسمها "كيزاد شرق بورسعيد"، ضمن منطقة شرق بورسعيد التابعة للمناطق الاقتصادية لقناة السويس..

الاتفاق اتوقع امبارح مع موانئ أبو ظبي، لإنشاء المنطقة على مساحة 20 كيلو متر مربع.. وبموجب الاتفاق، فموانئ أبو ظبي هتاخد المنطقة حق انتفاع لمدة 50 سنة، وهتبقى مسؤولة عن تجهيز البنية التحتية للمنطقة الصناعية على حسابها، علشان تبقى جاهزة لاستقبال الاستثمارات، مع تخصيص 15% من الإيرادات لمصر.. 

يعني انت بتتكلم عن منطقة صناعية على مساحة ضخمة، هتتجهز على حساب مستثمر أجنبي، وهتجذب استثمار صناعي محلي وأجنبي، فهتشغل ناس، و15% من إيراداتها مخصصة لمصر، وجزء من إنتاجها هيبقى تصدير للخارج يعني عملة أجنبية، وبعد 50 سنة هترجع بالكامل للمصريين.. 

هل في أي عاقل يشوف دي حاجة وحشة؟ أكيد لأ..

طب هل في أي بني آدم عنده حد أدنى من القدرات العقلية لو قرا الكلام ده، هيفهم انه يمس الممر الملاحي؟ أكيد بردو لأ.. 

طيب هي دي معارضة أو رأي مختلف أو وجهة نظر نسمعها.. ولا شكل من أشكال العبط؟ 

هسيبلكم الإجابة بقى!؟

وحالتزم الصمت.